اسئلة كتير بتجلنا عن موضوع " لو انا بحط بنزين 95 او 92 ينفع احط بنزين 80 نظرا لارتفاع سعر البنزين كتوفير يعنى "
بص يا سيدى 
هنكلم كلام علمى جدا .ركز معانا 
البنزين فى صورته الاولى بيكون واحد لكل الانواع 80 او 90 او 92 او 95 واللى بيفرق بينهم هيا المادة اللى بتتحط وبتدى رقم اوكتان للبنزين (المادة دى مستوردة ) وعلى حسب رقم الاوكتان دة بنقول ان دة بنزين 80 او 90 او غيره
طيب هيا اية الاجزاء الموجودة فى السيارة اللى بتتعامل مع البنزين اساسا ؟؟!!
اولا: تانك البنزين ثم طلمبه البنزين ثم يعدى على فلتر البنزين ثم مسطرة الرشاشات ثم اخيرا الرشاشات ودى اللى بتضخ البنزين فى غرف الاحتراق داخل الموتور ---دى اهم واخطر نقطة واللى منها نوع البنزين يفرق جدا فى السيارة ---
بص يا سيدى كل محرك بيكون ليه نسبه انضغاط وهى ببساطة وبدن تعقيد المسافة اللى بيتحركها البستم من (النقطة المميته السفلى ) الى ان يصل الى (النقطة المميته العليا) وطبعا احنا فاهمين ان البستم وظيفته ان يضغط الوقود (البنزين + الهواء) اثناء حركته من اسفل الى اعلى وعند الوصول الى اعلى نقطة تخرج شرارة كهربيه لحظة الوصول الى هذة النقطة (النقظة المميته العليا ) او بعد الوصول بوقت قصير جدا وهنا يحصل الانفجار وتتولد الحركة
طيب بالنسبه للسيارات الحديثه نفرض مثلا ان نسبه انضغاط الموتور 1: 10 معنى ذلك ان البستم يتحرك ليضعط البنزين من مسافة 10 سم الى 1 سم وهنا تخرج الشراره (عند الوصول لى 1 سم )ليحدث الانفجار ولكن الوقود الذى يتحمل هذا الانضغاط هو 92 او 95 فقط كما موضح فى كتالوج السيارة
نفرض ان حضرتك قولت هوفر واحط بنزين 80 اثناء حركه البستم فى نفس المحرك ليضغط الوقود من 10 سم الى 1 سم سينفجر الوقود قبل الوصول الى 1 سم(النقطة المميته العليا ) لان بنزين 80 مصمم للانفجار فى مسافة ولتكن 8 سم قبل مسافة الانضغاط المصمم لها الموتور الموجود بالسيارة الحديثة وهنا يولد قوه عكسيه على البستم ليحركة لاسفل قبل ان يصل الى النقطة المميته العليا (1 سم ) ودى يسبب سماع صوت يسمى( التصقيف )وكانك قررت ان تنهى عمر المحرك قبل عمره الافتراضى
