-->

قواعد تجديد الرخصه العشرون في مصر

قواعد تجديد الرخصه العشرون في مصر

    • قواعد تجديد الرخصة العشرون ..
    • 1- ما تروحش يوم خميس
    • 2- إياك تروح يوم سبت .. أنا حذرتك أهو ..
    • 3- ابعد عن الأحد بالمرة ..
    • 4- الاتنين حلو .. الاتنين حلو ما فيش كلام ..
    • 5- روح بدرى.. بدرى اوى.. بدرى اوى اوى..
    • 6- عشرينات كتيييير ..
    • 7- طوّل بالك ، انت فى مصر ..
    • 8- ادفع وانت ساكت ، انت - برضه - فى مصر ..
    • 9- لومعاك المثلث وشنطة الاسعافات والقمع والقميص الفسفورى وطفاية الحريق كده انت فى التمام ، بس هيخلوك تشترى جديد برضه 😂😂😂، فادفع من سكات لأن انت فى مصر ..
    • 10- عشرينات كتييييير ما تنساش ..
    • 11- مهندس الفحص 50 ، يمكن عشان مهندس .. اوعى العشرين ..
    • 12- خلى معاك 5 جنيه فضة عشان تصوير الورق ..
    • 13- عشرينات كتير قلنا وربنا ..
    • 14- وانت مستنى دورك على شباك المخالفات هتيجى فى بالك أسئلة وجودية كتير .. كيف بدأ الخلق .. ليه أنا مصرى .. فلان ده أنا مش طايقه طب ما أأجر حد يقتله .. كل دى وساوس من الشيطان .. هتلاقيه قاعد على الكرسى اللى جنبك .. استعذ بالله وفكك منه ..
    • 15- لو ورقك سليم ومرفق به ورقة فئة عشرين جنيه وانت داخل على الشباك هتلاقى الموظف هش وبش وقال لك " حضرتك " و " يا أفندم " .. وخلص لك أمورك بإبتسامة عريضة كمان .. فهين قرشك ولا تهين نفسك لأن انت فى مصر ..
    • 16- خد معاك اقلام كتير .. اللى يطلب منك قلم اديله واستعوض ربنا فيه لأنه مش هيرجع لك ..
    • 17- لو قال لك الرسوم 717 جنيه واداك ورقة بكده عشان تدفع فى الخزنة ورحت الخزنة أخدوا منك 755 جنيه وادوك ايصال بكده ما تستغربش .. تانى .. احنا فى مصر ..
    • 18- موبايلك يكون مشحون .. مهم جدا ..
    • 19- وانت مستنى تستلم الرخصة بعد ما خلصت كل حاجة هتلاقى إحساس بالسلام غمرك كده .. وإن كلك رضا عن الكون .. وإنك سامحت خصومك .. استمتع باللحظة دى قدر الإمكان .. دى من المزايا القليلة لكونك مصرى .. انتصارات صغيرة زى دى أكيد الأجانب محرومين منها ..
    • 20- فرحة استلام الرخصة لا تعادلها فرحة .. حاول ما تأفورش مراعاةً لشعور اخواتك اللى لسه مستنيين دورهم ..


    Admin
    @مرسلة بواسطة
    كاتب ومحرر اخبار اعمل في موقع اوتو كارز .

    إرسال تعليق